Atención xurídico-social

Encóntrase en:

O consumo de drogas constitúe un problema de profundas repercusións sociais. De feito é considerado un problema comunitario que afecta non so ó individuo senón tamén ó seu entorno, implicando a totalidade do colectivo social.

É unha realidade que o consumo de drogas conduce á delincuencia e multiplica a frecuencia delictiva dos suxeitos con hábitos antisociais, distinguindo así ó drogodependente-delincuente (comete actos delictivos pola súa adicción á sustancias-droga) do delincuente-drogodependente (individuo con hábitos antisociais que se ven incrementados polo consumo de sustancias).

Por outra parte, o actual sistema penal castiga a maioría dos delitos ca pena de privación de liberdade e esta debe cumprirse nuns centros penitenciarios que distan moito de reunir as condicións mínimas para favorecer a inserción social dos penados/as e que, polo contrario, contribúen á inadaptación social dos mesmos/as (masificación, consumo de drogas, etc.).

Dito o que antecede, plantexámonos como un tema prioritario o abordar o tema das drogodependencias e a súa relación co mundo da delincuencia, coa finalidade sobre todo de contribuír a unha maior concienciación do problema e de plantexar, na medida do posible, alternativas que poidan aplicarse para a incorporación social dos/das drogodependentes.

Xustifícase pois unha coordinación entre os Servizos Sociosanitarios, a Administración de Xustiza, a Policía e todos aqueles estamentos que, dunha forma ou outra, teñan algún tipo de intervención no campo das drogodependencias.

Obxectivos xerais

Facilita-la atención integral ó/á drogodependente con problemas legais.
Optimiza-la coordinación entre as distintas institucións e axentes implicados/as.
Informar e orientar a maxistrados, xuíces e fiscais sobre a situación persoal e social do/da drogodependente.

Obxectivos específicos

Informar e orientar sobre o proceso xudicial e/ou terapéutico a:
- Drogodependentes con problemas legais que estean en proceso de abandonar o consumo de drogas e ás súas familias.
- Maxistrados, xuíces, fiscais e órganos policiais.
- Institucións e recursos xudiciais e sociosanitarios.
- Poboación en xeral.
Prestar especial asesoramento técnico a xuíces e fiscais sobre a realidade social e persoal dos encausados/as.
Establecer unha coordinación con avogados/as, forenses, rede asistencial de drogodependencias e todas aquelas persoas que interveñan no proceso xudicial.
Coordinación con equipos médicos e asistenciais das institucións penitenciarias de referencia.

Destinatarios

Drogodependentes con problemas legais pendentes que desexen incorporarse a programas de tratamento, que o teñan interrompido e desexen reinicialo ou que xa estean incorporados, así como os que abandonaron o consumo.
Persoas cun entorno relacionado coas drogas (familia e amigos/as do afectado...).

Metodoloxía

A forma de recolle-las demandas pode ser múltiple:

A iniciativa do propio usuario/a.
A instancia dalgún membro do seu entorno: familia, servizos sociais, dispositivos asistenciais.
Por derivación de membros do ámbito xudicial e/ou policial.

É necesaria unha entrevista inicial co usuario/a onde se recollan todos aqueles datos que poida aportar en relación á problemática legal que presenta. A resposta á demanda centrarase na solución dos problemas plantexados, efectuando unha análise da realidade que leve a formular unha resposta axeitada.

Actividades

Asesoramento a xuíces e fiscais de cara a propoñer no seu caso unha alternativa terapéutica ó ingreso en prisión debidamente valorada.
Localización e revisión de dilixencias e expedientes.
Identificación dos avogados/as designados polo turno de oficio e entrevistas cos mesmos/as para plantexala defensa.
Elaboración/aportación de informes psico-sociais, clínicos, así como doutros medios de proba, que poidan ser de interese ó órgano xudicial competente.
Asistencias ós xuízos, se é o caso.
Coordinación con todas aquelas persoas que teñan relación co usuario/a e a súa problemática (U.A.Ds, equipos de tratamento dos centros penitenciarios, etc.).
Todas aquelas xestións necesarias para a solución dos problemas no ámbito legal.

Ubicación espacio temporal

O programa por criterios de eficacia e operatividade, e a través dun convenio de colaboración co concello, está ubicado nas instalacións do Servizo Municipal de Drogodependencias e, un día á semana, no local social da Asociación Renacer.